La nueva aventura de Pablo Fraile Dorado y Antonio Acebal llega col entamu de cursu y mira yá pal Samaín

En 2022, Pintar-Pintar Editorial presentó a la bruxa Gorgona, una protagonista tan espantible como entrañable que, na nueche de Samaín, perdía la so escoba. Aquella primer aventura convirtió la busca nun percorríu per un mundu de solombres, humor y personaxes singulares. «Bruxa» tuvo una segunda edición en 2024.

Agora, Gorgona torna con Maragatu, un gatín miagón, revolvín y zalameru que llegó nuna nueche de branu y acabó convirtiéndose nun miembru más de la familia. Cuando’l gatu desapaez xusto antes de la Nueche d’Ánimes, la bruxa tien que salir a buscalu.

Pintar-Pintar Editorial publica n’agostu de 2026 «Bruxa y gatu», el segundu álbum de Pablo Fraile Dorado y Antonio Acebal protagonizáu por Gorgona. La nueva hestoria recupera’l ritmu oral, la escoba que fala, los espectros burllones y el xuegu ente mieu y humor, pero cambia’l centru de la busca: Gorgona yá nun busca un oxetu, sinón un ser al que quier.

Nel camín atopará a Melusina, una guaxona famienta; a Calavera, metá muyer y metá lloba; a una colonia d’esperteyos; y a los espectros, qu’acompañen otra vuelta la busca cola so cantinela. La aventura avanza ente encruciyaes, tratos, equívocos y pistes hasta llegar a la casa de Ramón.

La publicación llega a finales de branu, coincidiendo col entamu del nuevu cursu y con tiempu pa que llibreríes, biblioteques y centros educativos incorporen el títulu a les sos propuestes de Samaín.

Una continuación con vida propia

El nuevu llibru caltién dalgunos de los elementos que fixeron reconocible «Bruxa», pero nun se limita a repetir la fórmula. La hestoria medra dende una pérdida distinta y dende un venceyu que nel primer álbum entovía nun esistía.

Nel centru ta una pregunta cenciella: ¿cuándo pasa daquién a formar parte de la familia? Maragatu entra na casa casi ensin permisu, ocupa un sitiu y, cuando falta, fai visible tolo que cambió. La busca ye fantástica, pero’l so motor ye reconocible: la preocupación por quien sentimos yá como de casa.

Maragatu, un sitiu na vida de Gorgona

Maragatu llega a la casa de Gorgona muertu de fame y de mimos. La bruxa abre la puerta con poca gana, posa un cuencu de lleche y avisa que’l gatu marchará pela mañana. Pero Maragatu entra, quédase, desfai les cortines, pide comida a l’amanecida y acaba ocupando un sitiu nel mandilón, na escoba y na vida de Gorgona.

El llibru nun necesita una declaración solemne pa contar esa acoyida. La familia constrúyese con xestos pequeños: dar de comer, facer sitiu, compartir viaxes, enfadase y, sobre manera, sentir el vacíu cuando l’otru nun ta.

De la casa al camín

Cuando Maragatu desapaez, la narración sal de casa y avanza per caminos, encruciyaes, cueves y una mina abandonada. La busca organiza’l llibru como un viaxe: cada personaxe da-y una pista, pide dalgo a cambiu o obliga a Gorgona a escoyer per ónde siguir.

El percorríu nun ye namás xeográficu. La bruxa pasa de la impaciencia a la preocupación, del enfadu al mieu y del mieu al alliviu. Nel camín descubre que Maragatu yá nun ye un convidáu provisional: ye de casa.

Samaín: tradición, humor y oralidá

La acción torna a la Nueche d’Ánimes, el tiempu nel que los muertos regresen y la frontera ente lo cotidiano y lo sobrenatural faise más fina. El Samaín nun apaez como un simple escenariu, sinón como’l motor de la hestoria: marca’l ritmu, activa los espectros y fai posible que Gorgona percorra caminos onde conviven vivos, muertos y seres fantásticos.

Melusina, la guaxona famienta; Calavera, metá muyer y metá lloba; los espectros burllones; y la colonia d’esperteyos formen parte d’un universu onde les figures de la tradición entren na narración con naturalidá. Nun se presenten como una llección sobre la tradición popular, sinón como personaxes con voz, humor y intereses propios.

Humor, mieu y tenrura

El llibru xuega a llevar al públicu d’una sensación a otra. Hai mieu na mina, tensión na busca y una solombra de perda na casa de Ramón, pero tamién equívocos, diálogos rápidos y bromes qu’allixeren la escuridá.

Gorgona sigue siendo una bruxa capaz de facer trastaes, amenazar a los espectros o negociar con una guaxona, pero la so preocupación por Maragatu amuesa una tenrura que nun contradiz el personaxe: complétalu.

Una hestoria pa escuchar

El testu ta pensáu pa ser lleíu en voz alta. Les repeticiones, les vocales allargaes, los diálogos y la cantinela marquen el ritmu de la busca y recuperen una musicalidá que conecta col primer llibru.

Antonio Acebal: una narración visual en movimientu

Les ilustraciones caltienen la silueta reconocible de Gorgona, el protagonismu de los planos de color y les formes llimpies del primer álbum. La bruxa y la escoba siguen siendo reconocibles dende lloñe, pero agora Maragatu amesta otru tipu de xestos: mirades, roces, esperes y movimientos más pequeños.

COLOR Y ATMÓSFERA
Los azules y grises abren l’espaciu del viaxe; los ocres y rosados dan calor a la casa; los roxos y negros anuncien el Samaín y el territoriu de los espectros. La lluz apaez nel cielu, nel fueu, nes ventanes o nuna antorcha.

ESCALA Y PAISAXE
El llibru amplía los escenarios: la casa, los montes, los caminos, les cueves, les viesques, una mina y la casa de Ramón. Delles vegaes los personaxes ocupen la páxina; otres, son figures pequeñes frente a un paisaxe enorme.

IMÁXENES QUE CUENTEN
Les imáxenes nun se llenden a repetir el testu. Amesten silencios ya información: l’humor de los secundarios, la presencia del espectru de la muyer de Ramón o la cercanía final ente la bruxa y el gatu.

CONTINUIDÁ Y RENOVACIÓN
«Bruxa y gatu» conserva una identidá gráfica común con «Bruxa», pero nun la copia. La segunda aventura ye más amplia, más itinerante y más coral: resulta reconocible como parte del mesmu universu y, al mesmu tiempu, abre caminos nuevos.

LOS AUTORES

Pablo Fraile Dorado
Pablo Fraile Dorado (Mieres, 1985) ye escritor y periodista. Dende’l 2017, espublizó los llibros infantiles Nueve cuentos azules, Arón el Gaturratón, Tigre va de gala, La llingua de les xanes, Bruxa y El cantar de la Reina Unicorniu. Como periodista, trabayó en medios como Europa Press y elmundo.es. Güei, vive en Maliayo, cuida de les sos fíes y almuerza escribiendo (dacuando).

Antonio Acebal
Cuento cuentos, hestories con colores y con llinies, fago dibuxos del mundu y pa tol mundu, el mundu de los neños del mundu. Cuento y recuento la hestoria de Sahar, de Bintou, la hestoria de Capiellina, Kalakamake, Arón o Gorgona. Cada páxina de color ye un mundu. Vivo de los cuentos que cuento o que me cuenten, y diéronme dalgunos premios de tanto dibuxar: Motiva d’Asturies, BIB de Bratislava. Y esta ye la mio hestoria en pequeño.

DOS LLIBROS, UN MESMO UNIVERSU 
«Bruxa y gatu» ye la segunda aventura de Gorgona firmada polos mesmos autores.
La continuidá ta na protagonista, na voz narrativa, na cantinela, nel humor y nuna manera d’ilustrar na que la silueta, el color y l’espaciu tienen tanta importancia como’l detalle. La nueva hestoria, sicasí, amplía’l mundu con un personaxe que cambia la vida cotidiana de Gorgona y acaba tresformándola tamién a ella: Maragatu.