El primer premiu, dotáu con 700 euros, foi pa la so obra “Mientres dure la tierra”. El segundu premiu, dotáu con 525 euros, llevólu’l cuentu “Indultu”, de Pelayo Martínez Olay (Llangréu, 1997), y Abel Martínez González (Uviéu, 1976) algamó’l tercer premiu, al que sey apurren 300 euros, con “Falsu direutu”.  Nesta edición el xuráu tuvo compuestu polos escritores Xulio Vixil Castañón, Miguel Rodríguez Monteavaro y Montserrat Garnacho Escayo, que destacaron “la cantidá, diversidá de temes y, sobre manera, la calidá de les obres presentaes, lo que complicó enforma la toma de decisiones”. De toes maneres, nel acta tamién dexaron una alvertencia xeneral: “a esti xuráu prestaría-y espeyar la importancia de la correición ortográfica na escritura, que nun siempre se correspuende cola calidá lliteraria”. Tres el branu l’Ayuntamientu Bimenes dará anuncia de la fecha del actu de reconocimientu a los premiaos nel que l’autor avilesín fadrá llectura pública del cuentu ganador. Xosé Nel Riesgo ye Llicenciáu en Xeografía pola Universidá d’Uviéu y Master en Desarrollu Local y n’Historia y Análisis Sociocultural (Universidá d’Uviéu) y n’Estudios Avanzaos n’Humanidaes (Universidá de La Rioja). Anguaño exerce’l so llabor profesional como profesor d’Enseñanza Secundaria. Amás d’abondos artículos, trabayos y cuentos en revistes y volúmenes coleutivos tien publicaos seis llibros: El cai nunca duerme (1989); Cuentos de la nevera (1997); Parque Temáticu (2005); Escrito na ceniza (2006); Venti negrinos (2014) y Tiempu d’escoria (2022). Tamién tien dellos premios de narrativa curtia, ente ellos un segundu y un tercer premiu nesti Concursu de Cuentos pola Oficialidá del Asturianu de Bimenes qu’agora algamó a ganar.