La plaza Hermanos Orbón vuelve a convertise nel Mercáu de Les Aceñes cola XXIII edición de la Seronda n'Avilés. Una celebración de la seronda, los sos productos y tradiciones más asturianes, van xuníos a comer bien y a la música allegre y de raigañu, protagonistes otru añu más, el vienres 6 y el sábadu 7 de payares.

 

Entamada pola Federación d'Asociaciones Xuntanza d'Avilés, el Conceyu d'Avilés cogla collaboración de La Plaza y Caxa Rural d'Asturies, presentóla güei pela mañana Yolanda Alonso, conceyala de Cultura.

 

Avilés reivindica la bayura de patrimoniu cultural de la seronda n'Asturies, memoria y presente. Una carpa presidirá l'espaciu nel qu'un chigre, xestionáu pola Asociación Cultural de Piniella, pa poder tastiar maraviyes como la sidra, les castañes o los tortos.

 

Tamién tendrá un escenariu nel que la música va ser otra de les grandes protagonistes del programa d'actividaes, yá dende la inauguración oficial, el vienres a les 19.30 hores (la carpa ábrese a les 19.00 hores) colos bailles y soníos más tradicionales gracies al trabayu de Xaréu d'ochobre y Escontra'l raigañu, pa siguir dempués cola Bandina Cuatrolán y terminar colos conciertos de Leirana (21.30 hores) y Herbamora (22.30 hores).

 

Pal otru día, el sábadu 7, l'actividá va entamr al mediudía, cola música de l'agrupación Iurretako Dantzariak, d'Iurreta (Vizcaya), l'apertura de la carpa y el chigre, a les 12.00 hores. A les 14:00 hores entamará la 'Xinta popular', con pote de berces y arroz con lleche.

 

Pela tarde hai un tiempu pa la reciella, cola animación d'Olga Cuervo y "Al abrigu de los cuentos", a les 17.00 hores. Dempués, volverá a actuar Iurretako Dantzariak como aperitivu de la 'Nueche en danza' cola Bandina Os Surriantes (20.30 h.), Los del Prau Chanu (21:30 h.) y el ramu va ponelu Killaphonía (22.30 h.).

 

 

Programa XXIII Seronda N'Avilés

 

Vienres 6 de payares

  • 18.30 hores. Animación na plaza cola Bandina Los Collaínos
  • 19.00 hores. Apertura de la carpa. Chigre con productos de seronda: sidra, castañes, tortos... Asociación Cultural de Piniella
  • 19.30 hores. Inauguración oficial de la XXIII Seronda n'Avilés. Amuesa de bailles y sones tradicionales con Xaréu d'ochobre y Escontra'l Raigañu
  • 21.00 hores. Animación cola Bandina Los Collaínos
  • 21.30 hores. Conciertu de Leirana
  • 22.30 hores. Conciertu d'Herbamora

 

Sábado 7 de payares

  • 12.00 hores. Apertura de la carpa. Chigre con productos de seronda: sidra, castañes, tortos... Asociación Cultural de Piniella. Animación na plaza con Iurretako Dantzariak
  • 14.00 hores. 'Xinta popular': pote de berces y arroz con lleche
  • 17.00 hores. Animación infantil, con Olga Cuervo: "Al abrigu los cuentos"
  • 19.30 hores. Amusa de bailles y sones tradicionales con Iurretako Dantzariak
  • 20.30 hores. 'Nueche en danza'. Actuación de la Bandina Os Surriantes
  • 21.30 hores. 'Nueche en danza'. Actuación de Los del Prau Chanu
  • 22:30 hores. 'Nueche en danza'. Actuación de Killaphonía