Les Xornaes celebraránse los díes 8, 9 y 10 de payares de 2016 y
nelles participarán un bon númberu de profesores ya investigadores
asturianos xunto con otros de distintes universidaes españoles y
estranxeres.
La sesión entamará coles presentaciones de la edición dixital del
númberu 115 de la revista Lletres Asturianes y del númberu 6 de la
revista Ciencies. Cartafueyos Asturianos de Ciencia y Teunoloxía. La
conferencia inaugural tará a cargu del profesor Aurelio González Ovies
(Universidá d'Uviéu) que falará sobre «"Aquella caxa llonxana", un
tópicu al que s'acerca la mayoría los poetes».
Pela tarde, les Xornaes s'abrirán cola conferencia del profesor Ramón
Mariño Paz (Universidá de Santiago de Compostela) sobre «El cultivo
escrito del gallego y del asturiano entre el ocaso medieval y el
renacimiento contemporáneo», seguida de les comunicaciones de
l'Académica Marta Mori d'Arriba y de les d'Esther Prieto Alonso, Inaciu
Galán y González y Emilio Frechilla Díaz.
L'actu pesllaráse coles ponencies «La aparición de la novela
criminal en asturiano y su relación con las literaturas de la
Península Ibérica» de Javier Rivero Grandoso, y «La mitoloxía
clásica nos anicios de la Lliteratura Asturiana» a cargu del profesor
de la Universidá d'Extremadura, Ramiro González Delgado.